Aller Guten Dinge sind…

Manchmoi braucht ma oafach an b’sonderen Moment, um rauszufinden wos in oam selber steckt… Manchmoi braucht ma zwoa oder drei… Bekanntermaßen san aller guten Dinge…

…eins…

I hab lang gmoant es is Sport. I bin in de Berg aufg’wachsn und do gheat Bewegung oafach dazua - egal ob beim Wandern, Mountainbiken oder Skiiifoan. Außerdem is ma ganz vui draußen in da Natur, des is oafach meins. Also hab i erstmoi Sport studiert. Währenddessen hod ma aber wos gfehlt…

Im Studium hob i ned wirklich wos mitgnumma, de Arbad im Fitnessstudio war zwar nett aber ned wirklich erfüllend. Des wos i mitgnumma hab is der Umgang mit Menschen, i hab so liebe Kollegen und Mitglieder kennaglernt und oafach gern mit de Leid gredt. I bin selbstbewusster und offener worden. Gleichzeitig hab i g'merkt des is ned mei Weg, auf mi wartet wos anderes. Irgendwann stand da Urlaub vor der Tür… i hab ned gwusst wohi und dann hod a sehr netter älterer Herr (da Max) gsagt: “Kimm nach Irland. Mei Sohn und i ham do a Haus!”

…oder doch zwei…

Mein Rucksack hab i glei backlt und scho war i in Irland. Das Grün so kräftig wie sonst nirgends. Die Menschen so herzlich und gesellig obwohl as Wetter oam manchmoi echt de Laune verderben kannt. I war ganz aloa unterwegs, nur mit meim Rucksack, bin von Hostel zu Hostel und hab dann an Max bsuacht. Mitnand ham ma de lokalen Pubs unsicher gmacht und san na glei mit de Einheimischen z’ratschen kemma. Kara und Nigel, a nettes junges Pärchen - beide Musiker - ham grod erst a Haus kauft. Im Pub ham ma glei a boor Lieder ogspuit und miteinander gsunga. Am nachsdn Abend hams uns glei zu sie eiglodn und mia ham a Jamsession gmacht. Do hab i’s dann gmerkt: Musik is ned nur des, wos i gern dua - es is a Teil vo mir. Ab do hab i’s gwusst: I muas Musik studieren oder zumindest wos damit ofanga.

…na DREI !!!

Es war ned oafach des oane abzubrechen und wos neis ozumfanga… Aber wos sui i sogn… Es hod sie definitiv gelohnt. Es war de beste Entscheidung meines Lebens. So tolle Erfahrungen mit so viele tolle Menschen hab i machen derfn. Seitdem war i im Acapella-Chor, in na boarischen Band, im Gitarrenensemble, hab a Duo mit oane vo meine besten Freindinna gegründet, i hab auf Hochzeiten, aufm Marktplatz und auf Festl gspuit und gsunga, und no ganz vui mehr...

In dene 3 Jahr hab i so vui für mi selber glernt, persönliche Ziele erreicht und Erfahrungen gsammelt, de mechd i niemals wieder hergeben. Was i damit sagen wui:

Es lohnt sie auf sei Herz zu hören!

Falls du grad zweifelst - Lass di ned aufhoitn! Dei Leidenschaft, dei Talent, des wos di erfüllt, des woast NUR DU! Du hosd des wos ma braucht. Zoag des wos in dir steckt! Manchmoi braucht ma oafach nur oan Stubs, oder zwoa oder drei Stupser.. in de richtige Richtung! Mach wos draus!

Mach’s guat daweil!

Dei Hannah