Alles auf einmal …

Kennst des, wenn richtig vui auf oamoi zammkimmd? Arbad, Deadlines, Entscheidungen, Freizeit und irgendwo zwischendrin merkst: Es steht a Veränderung an. A neie Richtung, a neie Möglichkeit – aber wo’s genau hi geht, des woaßt no ned…

Einerseits is es schee, weil ma merkt: Es passiert wos! Es geht wos voran, da Alltag is ned langweilig und da Kopf is voller Ideen und Pläne… Andererseits is es a echt vui. Ma denkt nach, z’vui vielleicht. De To-Do-Liste wird länger, es san zig Dinge, de g’plant, erledigt oder organisiert werdn miassn. Und dann is do no des G’fühl, dass boid wos Neies kimmt – wos Großes vielleicht. Wia bring i des do no unter? Mechd i des oide - in des i grod vielleicht erst richtig neigfundn hab - wirklich aufgeben für des wos kimmd?

Da Kopf rennt oiwei weiter, oiwei no an nachsdn Schritt. "Wos mach i dann?" "Bassd des üwahaupt?" "Werd i’s bereuen?" So vui Fragen und koa Antwort. I glab, genau des is da Punkt, an dem ma sich selbst manchmal ausbremsn muas. Ned oim im Kopf ois zerdenga, sondern Schritt für Schritt schaun, wos grad wirklich wichtig is.

So Phasen san nix Schlechtes. Sie zoagn, dass ma lebendig is, dass ma wos vo sie selber erwartet, dass ma ned steh bleibn mechd. Ma muas a auf sie selber aufbassn, dass ma sie ned überrennt. Manchmoi vergisst ma nämlich, dass es voll okay is, wenn ma ned ois auf amoi lösen ko.

Des Vertrauen in de Zukunft, des is a so a Sach. Es is leicht gsagt: „Wird scho oiwei ois so kumman, wia’s kumma sui.“ Aber wia oft glabt ma’s wirklich? Wia oft hod ma wirklich des Vertrauen, dass am Ende ois hihaut? Des is a Übungssach, des muas i mia selber oiwei wieder sogn.

Gott fädelt des scho richtig ei, du muasd ned oiwei ois glei wissn!

A Spruch, der mi oft begleit hod, is:

"Vertrau auf den Herrn mit ganzem Herzen und verlass dich nicht auf deinen Verstand. Denke an ihn auf allen deinen Wegen, so wird er dich recht führen." (Sprüche 3,5-6)

Vielleicht brauchst du geod genau des: Weniger grübeln, mehr vertrauen. Weniger hetzn, mehr den Moment sammeln. Und weniger Angst vorm Foischn, sondern mehr Freid auf’s neie Abenteuer ;)

Also, wenn’s da genauso geht: Ned vergessen, dass Veränderung a Chance is. Und manchmoi braucht’s oafach a bissl Geduld – und an guadn Kaffee. ☕😉

Mach’s gutat daweil!

Dei Hannah