Zeit für was?
Jedes Jahr nimmt ma si irgendwos vor. Ma kannt a Liste schreiben mit allem, wos ma anders, besser oder überhaupt amoi machen mechd. Wie lang is de Liste bei dir?
Erwartungen und Wirklichkeit
Samma moi ganz ehrlich… des haut ned imma so hi, wia ma sie des vorstellt oder? Manchmoi verliert ma völlig den Fokus. Ned nur für an Dog, sondern glei für a boor hintereinander. Ma steht auf und denkt sie: „Heid werd i produktiv sei!“ – und dann? Dann werd prokrastiniert, ma fangt ois mögliche o, bringt aber nix gscheid fertig. Dann fühlt ma sie so, als wenn ma nix zamm bringt und woaß ned, wia ma ois schaffn soll.
Aber der Moment in dem ma sogt: “Geh reiß die zahm und mach oafach Weida, egal wiavui du schaffst!” der kommt a wieder. Steh bleib’ bringt nix und Jammern a ned… Es is völlig in Ordnung, wenn ned jeder Dog perfekt lafft. Ma muas ned immer 100 % gebn und scho glei drei Moi ned rund um die Uhr. Des Beste gebn heißt ned, sie selber komplett auszubrennen!
Weil am Ende geht’s ned nur drum, wos ma ois g’schafft hod – sondern a drum, aufm Weg dort hi zu wachsen und zu erleben! ✨
Wie kann Jesus helfen?
Und genau do kimmt da Glaube ins Spiel. Wenn i wieder komplett überfordert bin, wenn i Zweifel hob – dann spirch i mit Jesus. I sog ihm ois, wos mi belastet. I vertrau drauf, dass er mi führt, dass er mir de Kraft gibt, de i grod ned find, dass i ned alloa bin in dem ganzen Wahnsinn.
„Seid stark und mutig! Fürchtet euch nicht und erschreckt nicht, denn der Herr, euer Gott, geht mit euch; er gibt euch nicht auf und lässt euch nicht allein.“ (5. Mose 31,6)
Meine Ziele
Heier mechd i mi auf des konzentrieren, wos wirklich zählt. Mei Fokus liegt ganz klar auf meiner Bachelorarbeit. Mei letztes Jahr an da Uni – des mechd i genießen, aber a gscheid nutzen! Ned nur wos doa, weil ma’s hoid muas, sondern wirklich wos mitnemma. Mi weiterentwickeln, wachsen und de Zeit bewusst erleben, statt nur vo Deadline zu Deadline zum hupfn. Wos is dei Plan für des Johr oder a nur de nachsdn Monate?
Mach’s guat daweil!
Dei Hannah